ಸ್ವಇಚ್ಛೆಯಿಂದ ಇಸ್ಲಾಂ ಧರ್ಮಕ್ಕೆ ಮತಾಂತರಗೊಂಡು ಮುಸ್ಲಿಂ ಯುವತಿಯನ್ನು ವಿವಾಹವಾಗಿದ್ದ 31 ವರ್ಷದ ಬಿ.ಫಾರ್ಮ್ ಪದವೀಧರನನ್ನು ಕುಟುಂಬದ ಅಕ್ರಮ ವಶದಿಂದ ಅಲಹಾಬಾದ್ ಹೈಕೋರ್ಟ್ ಮುಕ್ತಗೊಳಿಸಿದೆ. ತಂದೆಯ ದೂರಿನ ಮೇರೆಗೆ ಯುವಕನ ಪತ್ನಿ ಹಾಗೂ ಆಕೆಯ ಕುಟುಂಬದ ವಿರುದ್ಧ ‘ಉತ್ತರ ಪ್ರದೇಶ ಕಾನೂನುಬಾಹಿರ ಧಾರ್ಮಿಕ ಮತಾಂತರ ನಿಷೇಧ ಕಾಯ್ದೆ, 2021’ರ ಅಡಿಯಲ್ಲಿ ಪ್ರಕರಣ ದಾಖಲಿಸಿ, ಸರ್ಕಾರ ಹಾಗೂ ಪೊಲೀಸರು ಯುವಕನ ಅಕ್ರಮ ಬಂಧನಕ್ಕೆ ನೆರವಾಗಿದ್ದರು ಎಂಬ ಗಂಭೀರ ಆರೋಪಕ್ಕೆ ಸಂಬಂಧಿಸಿದಂತೆ ಹೈಕೋರ್ಟ್ ಉತ್ತರ ಪ್ರದೇಶ ಸರ್ಕಾರಕ್ಕೆ ಕಟ್ಟುನಿಟ್ಟಿನ ಸಂದೇಶ ರವಾನಿಸಿದೆ.
ಶ್ಯಾಮ್ಲಿ ಜಿಲ್ಲೆಯ ಆಯುಷ್ ಮಲಿಕ್ (ಮೊಹಮ್ಮದ್ ಅಲಿ) ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಸಂದೀಪ್ ಜೈನ್ ಅವರ ಪೀಠವು, ವ್ಯಕ್ತಿಯೊಬ್ಬರು ತನ್ನ ಧರ್ಮ, ವಾಸಸ್ಥಳ ಮತ್ತು ಜೀವನಸಂಗಾತಿಯನ್ನು ಆಯ್ಕೆ ಮಾಡಿಕೊಳ್ಳುವ ಸಂವಿಧಾನಬದ್ಧ ಹಕ್ಕನ್ನು ಕುಟುಂಬದ ಕಳವಳ ಅಥವಾ ತಂದೆಯ ಆಕ್ಷೇಪಣೆಗಳು ಮೀರಿಸಲು ಸಾಧ್ಯವಿಲ್ಲ ಎಂದು ಸ್ಪಷ್ಟಪಡಿಸಿದೆ. ಆಯುಷ್ ಮಲಿಕ್ ಅವರ ಸ್ನೇಹಿತ ಸುಲ್ತಾನ್ ಎಂಬುವರು ಸಲ್ಲಿಸಿದ್ದ ಹೆಬಿಯಸ್ ಕಾರ್ಪಸ್ ಅರ್ಜಿಯ ಹಿನ್ನೆಲೆಯಲ್ಲಿ ಸೆಪ್ಟೆಂಬರ್ 9 ರಂದು ನ್ಯಾಯಾಲಯವು ಆಯುಷ್ ಅವರನ್ನು ಖುದ್ದು ಹಾಜರುಪಡಿಸುವಂತೆ ತಂದೆ ದೇವ್‌ರಾಜ್ ಸಿಂಗ್ ಮಲಿಕ್ ಅವರಿಗೆ ಗಡುವು ನೀಡಿದ್ದು, ಅದರಂತೆ ಸೆಪ್ಟೆಂಬರ್ 16 ರಂದು ಆಯುಷ್ ಪೀಠದ ಎದುರು ಹಾಜರಾಗಿದ್ದರು.
ನ್ಯಾಯಾಲಯದಲ್ಲಿ ವಿಚಾರಣೆ ವೇಳೆ ಆಯುಷ್ ಮಲಿಕ್, ತಾವು ಯಾವುದೇ ಒತ್ತಡ ಅಥವಾ ಆಮಿಷವಿಲ್ಲದೆ ಸ್ವಇಚ್ಛೆಯಿಂದ ಇಸ್ಲಾಂ ಧರ್ಮ ಸ್ವೀಕರಿಸಿದ್ದು, ತಮ್ಮ ಪತ್ನಿ ಚಾಂದಿನಿ ಕುರೇಷಿ ಅವರೊಂದಿಗೆ ವಾಸಿಸಲು ಬಯಸುವುದಾಗಿ ಸ್ಪಷ್ಟಪಡಿಸಿದರು. ಇದೇ ವೇಳೆ, ಮಗನ ಆಸ್ತಿ ಹಾಗೂ ಭವಿಷ್ಯದ ಕುರಿತು ತಂದೆ ವ್ಯಕ್ತಪಡಿಸಿದ ಕಳವಳ ಕುಟುಂಬದ ಮಟ್ಟಿಗೆ ಅರ್ಥೈಸಿಕೊಳ್ಳಬಹುದಾದರೂ, ಅದು ಪ್ರಾಪ್ತವಯಸ್ಕ ವ್ಯಕ್ತಿಯ ವೈಯಕ್ತಿಕ ಸ್ವಾತಂತ್ರ್ಯಕ್ಕಿಂತ ಮಿಗಿಲಾದದ್ದಲ್ಲ ಎಂದು ಪೀಠ ನಮೂದಿಸಿದೆ.
ಅಷ್ಟೇ ಅಲ್ಲದೆ, ಈ ಪ್ರಕರಣದಲ್ಲಿ ಶ್ಯಾಮ್ಲಿ ಜಿಲ್ಲಾ ಪೊಲೀಸರು ಮತ್ತು ಸರ್ಕಾರಿ ಅಧಿಕಾರಿಗಳು ಯುವಕನನ್ನು ಅಕ್ರಮ ಬಂಧನದಲ್ಲಿಡಲು ಸಹಕರಿಸಿದ್ದಾರೆ ಎನ್ನಲಾದ ಆರೋಪವನ್ನು ತೀವ್ರವಾಗಿ ಪರಿಗಣಿಸಿದ ನ್ಯಾಯಾಲಯ, ಆಯುಷ್ ಮತ್ತು ಆತನ ಪತ್ನಿಯ ದೈನಂದಿನ ಜೀವನದಲ್ಲಿ ಪೊಲೀಸರು ಯಾವುದೇ ರೀತಿಯ ಅಡ್ಡಿಪಡಿಸಬಾರದು ಹಾಗೂ ಅವರ ವೈಯಕ್ತಿಕ ಸ್ವಾತಂತ್ರ್ಯಕ್ಕೆ ಸೂಕ್ತ ರಕ್ಷಣೆ ನೀಡಬೇಕು ಎಂದು ಆದೇಶಿಸಿದೆ.
