ಉತ್ತರ ಪ್ರದೇಶದ ಸಿದ್ಧಾರ್ಥನಗರ ಜಿಲ್ಲೆಯ ಡುಮರಿಯಾಗಂಜ್ ತಾಲೂಕಿನ ಪಿಪ್ರಾ ರಾಮಲಾಲ್ ಗ್ರಾಮದಲ್ಲಿ ಆಗಸ್ಟ್ 18ರ ಬೆಳಿಗ್ಗೆ ಅತಿಕ್ರಮಣ ತೆರವು ಕಾರ್ಯಾಚರಣೆ ನಡೆದಿದೆ. ಸುಮಾರು 350ರಿಂದ 400 ಮಕ್ಕಳು ವ್ಯಾಸಂಗ ಮಾಡುತ್ತಿದ್ದ ಮತ್ತು 1968ರಿಂದ ಸಕ್ರಿಯವಾಗಿದ್ದ ‘ಅರೇಬಿಯಾ ಝಿಯಾವುಲ್ ಉಲೂಮ್ ಮದರಸಾ’ (ಮಕ್ತಬ್ ಮದರಸಾ) ಹಾಗೂ ಮಸೀದಿಯ ಭಾಗವನ್ನು ಜಿಲ್ಲಾಡಳಿತವು ಬುಲ್ಡೋಜರ್ ಬಳಸಿ ಧ್ವಂಸಗೊಳಿಸಿದೆ. ಈ ಕಟ್ಟಡವನ್ನು ಆಟದ ಮೈದಾನವೆಂದು ಕಂದಾಯ ದಾಖಲೆಗಳಲ್ಲಿ ನಮೂದಾಗಿರುವ ಸರ್ಕಾರಿ ಜಾಗದಲ್ಲಿ (ಪ್ಲಾಟ್ ಸಂಖ್ಯೆ 1028 ಮತ್ತು 1029) ನಿರ್ಮಿಸಲಾಗಿದೆ ಎಂಬುದು ಆಡಳಿತ ಮಂಡಳಿಯ ವಿವರಣೆಯಾಗಿದೆ.
ಈ ಆಸ್ತಿಯು ವಕ್ಫ್ ಮಂಡಳಿಯಲ್ಲಿ ನೋಂದಣಿಯಾಗಿದೆ ಎಂದು ಮದರಸಾ ಆಡಳಿತ ಮಂಡಳಿ ವಾದಿಸಿ ತೆರವು ಕ್ರಮವನ್ನು ವಿರೋಧಿಸಿ ಕಾನೂನು ಹೋರಾಟ ನಡೆಸಿತ್ತು. ಆದರೆ, ತಹಶೀಲ್ದಾರ್ (ನ್ಯಾಯಾಂಗ) ಹೊರಡಿಸಿದ್ದ ತೆರವು ಆದೇಶವನ್ನು ಎತ್ತಿಹಿಡಿದಿದ್ದ ಜಿಲ್ಲಾಧಿಕಾರಿಗಳು, ಮದರಸಾ ಮಂಡಳಿಯ ಮೇಲ್ಮನವಿಯನ್ನು ವಜಾಗೊಳಿಸಿದ್ದರು. ಸ್ವಯಂಪ್ರೇರಿತ ತೆರವು ನೋಟಿಸ್‌ಗೆ ಸ್ಪಂದಿಸದ ಹಿನ್ನೆಲೆಯಲ್ಲಿ ಉತ್ತರ ಪ್ರದೇಶ ಕಂದಾಯ ಸಂಹಿತೆಯಡಿ ಈ ಕ್ರಮ ಕೈಗೊಳ್ಳಲಾಗಿದೆ. ಈ ಕಾರ್ಯಾಚರಣೆಯನ್ನು ಖಂಡಿಸಿ ಸ್ಥಳೀಯರು ಹಾಗೂ ಸಮಾಜವಾದಿ ಪಕ್ಷದ ಕಾರ್ಯಕರ್ತರು ಸ್ಥಳದಲ್ಲಿ ಪ್ರತಿಭಟನೆ ನಡೆಸಿದ್ದಾರೆ.
ವೀಡಿಯೊ ವೀಕ್ಷಿಸಿ:
