ತಾಲಿಬಾನ್ ವಿರೋಧಿ ಹೋರಾಟಗಾರ್ತಿ ಮಲಾಲಾ ಆತ್ಮಚರಿತ್ರೆ ಓದುಗರ ಮೇಲೆ ಬಜರಂಗದಳ ಕಾರ್ಯಕರ್ತರಿಂದ ಹಲ್ಲೆ

ಅಹಮದಾಬಾದ್‌ನ ವಸ್ತ್ರಾಪುರದಲ್ಲಿರುವ ಔಡಾ (AUDA) ಸಾರ್ವಜನಿಕ ಉದ್ಯಾನವನದಲ್ಲಿ ಶಾಂತಿಯುತವಾಗಿ ಪುಸ್ತಕ ಓದುತ್ತಿದ್ದ ಸಾಹಿತ್ಯ ಪ್ರಿಯರು ಹಾಗೂ ನಾಗರಿಕರ ಗುಂಪಿನ ಮೇಲೆ ಬಜರಂಗದಳ ಮತ್ತು ವಿಶ್ವ ಹಿಂದೂ ಪರಿಷತ್ (ವಿಎಚ್‌ಪಿ) ಕಾರ್ಯಕರ್ತರು ಹಲ್ಲೆ ನಡೆಸಿದ್ದಾರೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ. ಗುರುವಾರ ಸಂಜೆ ನಡೆದ ಈ ದಾಳಿಯಲ್ಲಿ ಹಲವರು ಗಾಯಗೊಂಡಿದ್ದು, ಮೂವರನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.  

ಸ್ಥಳೀಯ ಶಾಲೆಯೊಂದರ ಪಠ್ಯಕ್ರಮದಿಂದ ನೊಬೆಲ್ ಪುರಸ್ಕೃತ ತಾಲಿಬಾನ್ ವಿರೋಧಿ ಹೋರಾಟಗಾರ್ತಿ ಮಲಾಲ ಯೂಸುಫ್‌ಜೈ ಅವರ ‘ಐ ಆಮ್ ಮಲಾಲ’ ಆತ್ಮಚರಿತ್ರೆ ಹಾಗೂ ಆ್ಯನ್ ಫ್ರಾಂಕ್ ಅವರ ‘ದಿ ಡೈರಿ ಆಫ್ ಎ ಯಂಗ್ ಗರ್ಲ್’ ಪುಸ್ತಕಗಳನ್ನು ತೆಗೆದುಹಾಕಿದ್ದನ್ನು ವಿರೋಧಿಸಿ ವಿದ್ಯಾರ್ಥಿಗಳು, ವಕೀಲರು ಹಾಗೂ ಮಾಧ್ಯಮ ಪ್ರತಿನಿಧಿಗಳು ಉದ್ಯಾನವನದಲ್ಲಿ ಮೌನ ವಾಚನ ಆಯೋಜಿಸಿದ್ದರು.

ಸಂಜೆ 6.30ರ ಸುಮಾರಿಗೆ ಮೌನ ಓದು ಮುಗಿಸಿ ಮರಳುತ್ತಿದ್ದ ವೇಳೆ, ಲಾಠಿ ಹಾಗೂ ಕ್ರಿಕೆಟ್ ಬ್ಯಾಟ್‌ ಹಿಡಿದು ಬಂದ 20ಕ್ಕೂ ಹೆಚ್ಚು ಕಾರ್ಯಕರ್ತರು “ಮಲಾಲಾ ಅವರ ಪುಸ್ತಕವನ್ನು ಏಕೆ ಓದುತ್ತಿದ್ದೀರ?” ಎಂದು ಪ್ರಶ್ನಿಸಿ ಗಲಾಟೆ ಆರಂಭಿಸಿದ್ದಾರೆ. ಓದುಗರ ಮೇಲೆ ನಡೆಸಿದ ಹಲ್ಲೆಯಲ್ಲಿ ಕನಿಷ್ಠ 4 ರಿಂದ 8 ಜನರು ಗಾಯಗೊಂಡಿದ್ದಾರೆ. ಘಟನೆಗೆ ಸಂಬಂಧಿಸಿದಂತೆ ಜೈಕುಮಾರ್ ಠಾಕ್ಕರ್ ಎಂಬುವವರು ನೀಡಿದ ದೂರಿನನ್ವಯ ಭಾರತೀಯ ನ್ಯಾಯ ಸಂಹಿತೆಯ (BNS) ಅಡಿಯಲ್ಲಿ ಪ್ರಕರಣ ದಾಖಲಿಸಿಕೊಂಡಿರುವ ವಸ್ತ್ರಾಪುರ ಪೊಲೀಸರು ಮೂವರನ್ನು ಬಂಧಿಸಿದ್ದು, ಇತರ ಆರೋಪಿಗಳ ಪತ್ತೆಗೆ ಬಲೆ ಬೀಸಿದ್ದಾರೆ.  

ವಿವಾದದ ಹಿನ್ನೆಲೆ: ಶಾಲೆಯಿಂದ ಕೃತಿಗಳ ಹಿಂಪಡೆಯುವಿಕೆ

ಅಹಮದಾಬಾದ್‌ನ ಶೀಲಜ್‌ನಲ್ಲಿರುವ ಆನಂದ್ ನಿಕೇತನ್ ಶಾಲೆಯ 5ನೇ ತರಗತಿ ವಿದ್ಯಾರ್ಥಿಗಳಿಗೆ ‘ಬುಕ್ ಕ್ಲಬ್’ ಕಾರ್ಯಕ್ರಮದಡಿ ಮಲಾಲ ಹಾಗೂ ಆ್ಯನ್ ಫ್ರಾಂಕ್ ಅವರ ಪುಸ್ತಕಗಳನ್ನು ಓದಲು ನೀಡಲಾಗಿತ್ತು. ಆದರೆ, ಬಲಪಂಥೀಯ ಸಂಘಟನೆಗಳು ಹಾಗೂ ಕೆಲವು ಪೋಷಕರು ಈ ಕೃತಿಗಳು ಒಂದು ನಿರ್ದಿಷ್ಟ ವಿಚಾರಧಾರೆಯನ್ನು ಪ್ರಚೋದಿಸುತ್ತವೆ ಎಂದು ಆರೋಪಿಸಿ ಪ್ರತಿಭಟನೆ ನಡೆಸಿದ್ದರು.  

ಇದರ ಬೆನ್ನಲ್ಲೇ ಜಿಲ್ಲಾ ಶಿಕ್ಷಣಾಧಿಕಾರಿಗಳು ಶಾಲಾ ಆಡಳಿತ ಮಂಡಳಿಗೆ ನೋಟಿಸ್ ನೀಡಿ 10,000 ರೂಪಾಯಿ ದಂಡ ವಿಧಿಸಿದ್ದರು. ಶಿಕ್ಷಣ ಇಲಾಖೆಯ ನಿರ್ದೇಶನದಂತೆ ಶಾಲೆ ತನ್ನ ಶಿಕ್ಷಣ ಸಲಹೆಗಾರರನ್ನು ವಜಾಗೊಳಿಸಿ, ಈ ಎರಡೂ ಪುಸ್ತಕಗಳನ್ನು ಕಡ್ಡಾಯ ಪಠ್ಯಕ್ರಮದ ಪಟ್ಟಿಯಿಂದ ಸಂಪೂರ್ಣವಾಗಿ ತೆಗೆದುಹಾಕಿತ್ತು.

ಓದುವ ಹಕ್ಕು ಮತ್ತು ‘ಭಾರತ ವಿರೋಧಿ’ ಆರೋಪ

ಶಾಲೆಯ ಈ ಕ್ರಮವನ್ನು ವಿರೋಧಿಸಿ ‘ಸ್ಟೂಡೆಂಟ್ ಅಂಡ್ ಯೂತ್ ಕಲೆಕ್ಟಿವ್’ ಆಯೋಜಿಸಿದ್ದ ಮೌನ ಓದುವ ಕಾರ್ಯಕ್ರಮದಲ್ಲಿ ಭಗತ್ ಸಿಂಗ್ ಅವರ ‘ವೈ ಐ ಆಮ್ ಆನ್ ಅಥೆಯಿಸ್ಟ್’, ಜಾರ್ಜ್ ಆರ್ವೆಲ್ ಅವರ ‘1984’ ಸೇರಿದಂತೆ ವಿವಿಧ ಸಾಹಿತ್ಯ ಕೃತಿಗಳನ್ನು ಭಾಗವಹಿಸಿದವರು ಓದುತ್ತಿದ್ದರು.

ಘಟನೆಯ ಕುರಿತು ತಮ್ಮ ಅಧಿಕೃತ ‘ಎಕ್ಸ್’ (X) ಖಾತೆಯಲ್ಲಿ ಸಮರ್ಥಿಸಿಕೊಂಡಿರುವ ಬಜರಂಗದಳ, “ಕಾಶ್ಮೀರ ವಿಚಾರದಲ್ಲಿ ಭಾರತದ ನಿಲುವನ್ನು ವಿರೋಧಿಸುವ ಮಲಾಲಾ ಅವರ ಪುಸ್ತಕ ಓದುವುದನ್ನು ನಾವು ವಿರೋಧಿಸಿದ್ದೇವೆ. ಪಾಕಿಸ್ತಾನ ಬೆಂಬಲಿತ ಮನಸ್ಥಿತಿಗೆ ನಾವು ನಮ್ಮ ಶೈಲಿಯಲ್ಲೇ ಉತ್ತರಿಸಿದ್ದೇವೆ” ಎಂದು ಪೋಸ್ಟ್ ಮಾಡಿದೆ.  

ಇನ್ನೊಂದೆಡೆ ಪ್ರತಿಭಟನಾಕಾರರು ತಮ್ಮ ಪ್ರಜಾಸತ್ತಾತ್ಮಕ ಓದುವ ಹಕ್ಕನ್ನು ಪ್ರತಿಪಾದಿಸಿದ್ದಾರೆ. “ಯಾರು ಯಾವ ಪುಸ್ತಕ ಓದಬೇಕು ಎಂಬುದನ್ನು ಇತರರು ತೀರ್ಮಾನಿಸಲು ಸಾಧ್ಯವಿಲ್ಲ. ಮಲಾಲಾ ಅವರ ಕಥೆ ಹೆಣ್ಣುಮಕ್ಕಳ ಶಿಕ್ಷಣದ ಹೋರಾಟದ ಸಂಕೇತವಾಗಿದೆ. ಸ್ಪೂರ್ತಿಯನ್ನು ಧರ್ಮ ಅಥವಾ ರಾಷ್ಟ್ರೀಯತೆಯ ಚೌಕಟ್ಟಿನಲ್ಲಿ ನೋಡಬಾರದು” ಎಂದು ಭಾಗವಹಿಸಿದ್ದ ವಿದ್ಯಾರ್ಥಿಗಳು ಅಭಿಪ್ರಾಯಪಟ್ಟಿದ್ದಾರೆ.  

ವಸ್ತ್ರಾಪುರ ಪೊಲೀಸರು ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಿಸಿಟಿವಿ (CCTV) ದೃಶ್ಯಾವಳಿಗಳನ್ನು ಪರಿಶೀಲಿಸುತ್ತಿದ್ದು, ಹಲ್ಲೆಯಲ್ಲಿ ಭಾಗಿಯಾದ ಇತರ ಶಂಕಿತರನ್ನು ಪತ್ತೆಹಚ್ಚುವ ಕಾರ್ಯ ಮುಂದುವರಿಸಿದ್ದಾರೆ. ಸಾರ್ವಜನಿಕ ಸ್ಥಳದಲ್ಲಿ ಸಾಹಿತ್ಯ ಪ್ರಿಯರ ಮೇಲಿನ ಈ ದಾಳಿಯನ್ನು ನಾಗರಿಕ ಸಮಾಜದ ಮುಖಂಡರು ಹಾಗೂ ಸಾಹಿತಿಗಳು ತೀವ್ರವಾಗಿ ಖಂಡಿಸಿದ್ದಾರೆ.