ಉತ್ತರ ಪ್ರದೇಶದಲ್ಲಿ ಶಿಕ್ಷಣ ಮತ್ತು ಉದ್ಯೋಗಕ್ಕೆ ಸಂಬಂಧಿಸಿದ ಯುವಜನರ ಸಮಸ್ಯೆಗಳನ್ನು ಮುನ್ನೆಲೆಗೆ ತರಲು ಹಲವು ಯುವ ಸಂಘಟನೆಗಳು ಒಂದಾಗಿ ‘ಜಸ್ಟಿಸ್ ಮೋರ್ಚಾ’ ವೇದಿಕೆಯನ್ನು ರಚಿಸಿವೆ. ಲಕ್ನೋ ಪ್ರೆಸ್ ಕ್ಲಬ್‌ನಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮೋರ್ಚಾ ನಾಯಕರು ರಾಜ್ಯದಾದ್ಯಂತ 50 ದಿನಗಳ ಬೃಹತ್ ಜಾಗೃತಿ ಅಭಿಯಾನವನ್ನು ಪ್ರಕಟಿಸಿದ್ದಾರೆ. ಇತ್ತೀಚೆಗೆ ದೆಹಲಿಯ ಜಂತರ್ ಮಂತರ್‌ನಲ್ಲಿ ನಡೆದ ಜಿನ್ ಝಿ ಪ್ರತಿಭಟನೆಗಳಿಂದ ಪ್ರೇರಣೆ ಪಡೆದು ಈ ನಿರ್ಧಾರ ತಳೆಯಲಾಗಿದೆ.
ಈ ಅಭಿಯಾನವು ಆಗಸ್ಟ್ 12ರಿಂದ ಚಾಲನೆ ಪಡೆಯಲಿದ್ದು, ರಾಜ್ಯದ 75 ಜಿಲ್ಲೆಗಳ 800ಕ್ಕೂ ಹೆಚ್ಚು ಕಾಲೇಜು ಹಾಗೂ ತರಬೇತಿ ಕೇಂದ್ರಗಳಲ್ಲಿ ಸಂವಾದ ಮತ್ತು ಸಾರ್ವಜನಿಕ ಚರ್ಚೆಗಳು ನಡೆಯಲಿವೆ. ಜೊತೆಗೆ ಆಗಸ್ಟ್ 20ರಂದು ಚೌರಿ ಚೌರಾದಿಂದ ಆರಂಭವಾಗುವ ಬೃಹತ್ ಸೈಕಲ್ ಜಾಥಾ, ಅಕ್ಟೋಬರ್ 2ರಂದು ಲಕ್ನೋದ ಕಾಕೋರಿಯಲ್ಲಿ ಮುಕ್ತಾಯಗೊಳ್ಳಲಿದೆ.
ಮೋರ್ಚಾ ಪ್ರಮುಖವಾಗಿ 10 ಬೇಡಿಕೆಗಳನ್ನು ಸರ್ಕಾರದ ಮುಂದಿಟ್ಟಿದೆ. ವಾರ್ಷಿಕ ಪರೀಕ್ಷಾ ಕ್ಯಾಲೆಂಡರ್ ಪ್ರಕಟಿಸುವುದು, ಸರ್ಕಾರಿ ಖಾಲಿ ಹುದ್ದೆಗಳ ತಕ್ಷಣ ಭರ್ತಿ, ರಾಷ್ಟ್ರೀಯ ಶಿಕ್ಷಣ ನೀತಿ 2020 ಮತ್ತು ಎನ್‌ಟಿಎ ರದ್ದು, ಗುತ್ತಿಗೆ ಪದ್ಧತಿ ಕೊನೆಗೊಳಿಸಿ ಸಮಾನ ವೇತನ ನೀಡುವುದು, ಪರೀಕ್ಷಾ ಸೋರಿಕೆ ವಿರುದ್ಧ ಪ್ರತಿಭಟಿಸಿದವರ ಮೇಲಿನ ಪ್ರಕರಣ ಹಿಂಪಡೆಯುವುದು ಹಾಗೂ ಖಾಸಗಿ ಶಾಲೆಗಳ ಶುಲ್ಕ ನಿಯಂತ್ರಣ ಇವುಗಳಲ್ಲಿ ಮುಖ್ಯವಾಗಿವೆ.
